இன்னும் மிச்சமிருக்கு சுனாமி

செத்துப் போவோம்னு தெரிஞ்சா
யாராச்சும் வாழ நினைப்பாங்களா
செத்துப் போனவகளைப் பார்த்தும்
சீவன் அழியாதுனு சொல்லி இருக்கு

அழிஞ்சிப் போனதை அறிஞ்சும்
அங்கனேயே வீடு கட்டி
தொலைஞ்சி போற சனம்
நாமில்லைனு சொல்லனும்
துன்பத்தை நாமதான
எட்டாத விலை சொன்னாலும்
விலைக்கு வாங்கனும்

அஸ்திவாரம் சரியில்லாம
விழுற வீடு போல இல்லாம
இந்த அலை வந்து
தொட்டு இழுத்தாலும்
போய்ச் சேராம
அசையாத கட்டிடம் தான்
நாம கட்டி வைக்கனும்
நம்ம பேரை இந்த கட்டிடத்தில
பொறிச்சி வைக்கனும்
என்ஜீனியரு யாருனு
எல்லாரும் கேட்கனும்

அழிச்சாலும் முளைச்சி வரும்
வீடு விதை இருக்கா
உழைக்காம வாழத்தான்
ஏதும் வழி இருக்கா
இன்னைக்கு சீரியலுல
என்ன நடக்குதுனு
பாக்கனும்
இப்படியே நின்னு
நினைப்பை மினுக்கிக்கிட்டா
வேலை அது பறி போயிரும்!

இனி எல்லாமே கனவு!

வண்ண வண்ண விளக்குகள் இல்லை 
வர்ணம் பூசிய மனிதர்கள் இல்லை 
உயரமாய் கட்டப்பட்ட மேடை இல்லை 
சுற்றி நிற்கும் பாதுகாவலர் இல்லை 

கைத்தட்ட காசு வாங்கி 
வந்து அமர்ந்த மனிதரும் இல்லை 
வாக்கு சேகரிக்க தேவையற்ற 
வாக்கு இங்கு கொடுக்கவும் இல்லை 

சுதந்திரம்தனை தப்பாய் புரிந்தவரில்லை இங்கே 
சுதந்திர காற்றை மாசுபடுத்தும் கூட்டமுமில்லை 
இங்கே 
தலைவரென்று தனிமைப் படுத்துவதில்லை இங்கே 
துணிவை தொலைக்கும் தலைவரில்லை இங்கே 

புரியும்படியாய் சொல்வதும் உண்டு 
புரிந்து நடந்திடும் பொன்மனம் உண்டு 
வாங்கி தந்த சுதந்திரம்தனில் 
வாழ்ந்து மகிழ்ந்திட வருவாயா அண்ணலே!

இளந்துறவி

உங்கள் கண்களுக்கு 
பொம்மைகளுடன் விளையாடும் வயதுதான் எனக்கு 
என் மனதில் 
பொம்மைகளை தூரம் தள்ளிவைக்கும் பக்குவம் எனக்கு 

எவரும் துறக்கச் சொல்லி துறப்பதில்லை 
வேண்டியே வெறுத்து எதுவும் ஒதுக்குவதில்லை 
பொருட்கள் வேண்டி சிறக்கும் நீங்கள் 
பொறுப்புடன் வளர்கிறேன் வந்து பாருங்கள் 

புன்னகை ஏந்தியே பூஜிக்கின்றேன் 
புரியும் வாழ்க்கையதை 
பள்ளி தொடாமல் பயில்கின்றேன் 
இறை உணர்வினால் மட்டுமே உயிர் சுமக்கின்றேன் 
சுமக்கும் உயிரை அவனுக்கே சமர்ப்பிக்கின்றேன் 

உங்கள் வாழ்க்கைக்கு நான் வருவதில்லை 
எந்தன் வாழ்க்கையில் உங்களுக்கு சுகமில்லை 
பொன்னும் பொருளும் பேணியும் 
எந்தன் வாசல் தொட்டு வணங்கிச் செல்வீர் 

என்றும் துறந்து விடாத ஒன்றில் 
எந்தன் மனதின் பற்று வைத்தே மகிழ்கின்றேன் 
துறந்துவிடும் விசயத்தில் பற்று வைத்திடும் உங்களுக்கு 
நானா தெரிகிறேன் துறவியாய்?