கால காலமாய்

ஆயகலைகள் அறுபத்தி நான்கு
அறிந்தது இல்லை
புரதங்கள் செய்யும்
அமினோ அமிலங்கள் இருபதை
அழைத்து அமர வைக்கும்
கோடான்கள் அறுபத்தி நான்கு
புரிந்தது இல்லை

சுற்றும் கோமெட்டில் கணக்கற்ற
அமினோஅமிலங்கள்
உயிர் படைக்கத் தெரிவதில்லை
தோன்றியதிலிருந்து எம்மாற்றம்
கொள்ளாத ஆஸ்டிராய்டுகள்
வணங்கத்தக்க கல்லும் இல்லை

படைக்கும் பிரம்மன் நான்முகன்
பார்த்தது இல்லை
செய்தி சுமந்து
செயல் கட்டளையிடும்
நியூக்ளிக் அமில அமினோ நான்கு
அதன் மாற்றுக்காக ஒன்று
நினைவில் நிற்பதில்லை

பஞ்ச பூதங்கள் மந்திர மாயங்கள்
பழகியது இல்லை
இயற்கையோடு உரசி நிற்கும்
செயற்கை விசயங்கள்
இசைந்தது இல்லை

மனிதரை குணத்தால் மூன்றாக
செயலால் நான்காக
பிரித்ததின் காரணம் நல்லதில்லை
சமமென சாதித்திட
எந்த ஒரு பாதையும்
இங்கு ஒழுங்கில்லை

காற்றில் கரியமில வாயு, ஆக்ஸிஜன்
நைட்ரஜன் கணக்கிருக்கும்
கண்டது இல்லை
எந்த காற்று என்ன மொழி
சுமக்கிறதோ தெரியவில்லை
எண்ணற்ற மொழி வந்த
நோக்கம் புரியவில்லை

ஈர்ப்புவிசையால் விலகிச் சுற்றி
ஈர்ப்புக்கள் இழுபடாது இருக்கும்
கோள்களின் இயக்கம்
தெளிந்தது இல்லை
எண்ணற்ற சூரியன்கள் இருந்தும்
சுற்றுகின்ற பல கோள்கள் இருந்தும்
உயிர் சுமக்கும் கோள் ஒன்று
உயிர் படைத்து, காத்து அழித்து
நிலையாய் நிற்பவன் ஒன்று
உறுதி இல்லை

அண்ட செல்லில்
இருக்கும் மைட்டோகாண்டிரியா
சைட்டோபிளாசம்
சேய் செல்லில் மாற்றம் கொள்வதில்லை
விந்து செல்லில்
இருக்கும் மரபணுக்கள் தவிர
சேய் செல்லில் எதுவும் சேர்வதில்லை
சக்தி சக்தி என தாயை
அழைப்பதன் அர்த்தம் புரிவதில்லை
மைட்டோகாண்டிரியா சக்தியின் இருப்பிடம்
மனம் உருக்கும் விசயம் அறிவதில்லை

முடிவில்லா மாற்றம் கொள்ளும் சக்தி
தோற்றம் சொன்னதில்லை
கடவுள் கண்டதாய்
எந்த ஞானியும் சத்தியம்
செய்தது இல்லை
அன்பை சிவமென கூறி
ஏழையின் சிரிப்பில் இறைவனை சொல்லி
காசை கடவுளாக்கிட...
விளங்கமுடிவதில்லை
அவதாரம் வருவதற்கான
காலம் வெகு அருகில் இல்லை.

ஈரோடு புத்தகத் திருவிழாவில் நுனிப்புல்

நான் முதன்முதலில் எழுதிய நாவல் நுனிப்புல் ( பாகம் 1) ஈரோடு பல்லவி பப்ளிகேஷன்ஸ் நிறுவனத்தாரினால் ஈரோடு புத்தகத் திருவிழாவில் பார்வைக்கும், விற்பனைக்கும் வைக்கப்பட்டிருக்கிறது என்பதை மகிழ்வுடன் தெரிவித்துக் கொள்கிறேன்.

தேடினால் கிடைத்துவிடும் - 9

மீண்டும் மழை வந்து சேர்ந்தது. மழையில் சற்று தொலைவுக்குச் சென்றவுடன் ஓட்டுநர் முதற்கொண்டு மற்றவர்கள் தங்களால் இனிமேல் பயணத்தைத் தொடரமுடியாது, இங்கிருந்து நாங்கள் திரும்பிச் செல்கிறோம். நீங்கள் எப்படியாவது போய்ச் சேருங்கள் என அந்த நபரையும், கோவிந்தசாமியையும் தனியாய் விட்டுவிட்டு செல்லத் திட்டமிட்டார்கள். அதற்கு அந்த நபர், பாதை இன்னும் கொஞ்ச தூரம் போனால் சரியாகிவிடும், இப்படி எங்களை தனியாக விட்டுவிட்டால் நாங்கள் செல்ல முடியாது என நினைத்தீர்களா? எனக் கேட்டார்.

பாதை மிகவும் மோசமாக இருக்கிறது, தொடர்ந்து சென்றால் வாகனம் பழுது அடைந்துவிடும். வாகனத்தை தனியாய் விட்டுச் சென்றால் எனது முதலாளிக்கு நான் என்ன பதில் சொல்வது. தங்கத்தை மாற்றும் வழியெல்லாம் நீங்கள் கற்றுக்கொண்டுவிட்டு எங்களுக்கு சொல்லித் தாருங்கள் என அவர்கள் சொன்னதும் கோவிந்தசாமி மிகவும் கவலையுற்றார். ஆனால் அந்த நபர் அதற்கெல்லாம் கவலைப் படவில்லை. மற்றவர்களை நோக்கி கேட்டார், என்ன செய்யப் போகிறீர்கள் என. அதற்கு அவர்கள் இப்போது செல்வது சரியாகப்படவில்லை, பாதை வேறு மிகவும் மோசமாக இருக்கிறது, உங்கள் பேச்சினை நம்பி நாங்கள் யோசிக்காமல் கிளம்பி வந்துவிட்டோம் எனவே எங்களுடன் திரும்ப வாருங்கள் அல்லது எங்களையாவது போக விடுங்கள் என சொன்னார்கள்.

அந்த நபர் உடனே பணத்தில் கொஞ்சம் பிடித்துக் கொண்டு நீங்கள் செல்லுங்கள் என அவர்களை அனுப்பினார். கோவிந்தசாமி புதையைலை எடுத்தே தீர்வது எனவும் இவ்வளவு தூரம் வந்துவிட்டு காசியைப் பார்க்காமல் செல்வதா எனவும், ஒருவர் கொடுத்த வேலையை செய்யாமல் செல்வதா என அந்த நபருடனே செல்வது என முடிவு செய்து அவருடன் நடக்க ஆயத்தமானார்.

கோவிந்சாமியைப் பார்த்து அந்த நபர், இப்படித்தான் வாழ்க்கையில் ஒரு பயணத்தை தொடங்கிவிட்டு ஒழுங்காக முடிக்க இயலாமல் பலர் கஷ்டம் என எண்ணி கைவிட்டு விடுகிறார்கள். நமது செயல் குறிக்கோள், எந்த தடைகள் வந்தாலும் அதனை ஒதுக்கித் தள்ளிவிட்டு அந்த விசயத்தை அடைவதற்கு மனோ தைரியம் வேண்டும், உங்களுக்கு வயதாகிவிட்டதே அன்றி மனோ தைரியம் அதிகம் இருக்கிறது என்றார்.

வியாபாரத்தில் எத்தனையோ பிரச்சினைகள் வந்தபோதும் மனம் தளராமல் எடுத்த காரியத்தில் வெற்றி பெறாமல் அமரந்தது இல்லை, இப்பொழுது இந்த காரியம் எடுத்துவிட்டேன், மனம் தளர்ந்தும் விட்டேன். ஆனால் அந்த வயதானவரை சந்தித்தபின்னர் எப்படியாவது இந்த புதையலையும் காசியையும் கண்டுவிடவேண்டும் என வைராக்கியம் கொண்டேன், பிடிக்காத தொழிலையும் புரிந்து ஓரளவு பணம் ஈட்டினேன், எனது பாதைக்கு வழிகாட்டியாய் உங்களை தந்துவிட்டான் இறைவன் என்றார் கோவிந்தசாமி.

மழை நின்று போயிருந்தது. வழியில் சென்ற ஒரு வாகனத்தை நிறுத்தினார் அந்த நபர். எங்கே செல்ல வேண்டும் என கேட்டார் அந்த வாகன ஓட்டி. காசி என சொன்னதும், காசிக்கு செல்லாது, அதற்கு முன்னால் உள்ள இடத்திற்கு வரை செல்லும், ஏறிக்கொள்ளுங்கள் என்றார். உள்ளே பலர் அமர்ந்து இருந்தனர். அவர்களுடன் இவர்களும் அமர்ந்தார்கள். நெரிசலாக இருந்தது. வாகனத்தை மிகவும் லாவகமாக ஓட்டினார். வாகனம் பழுது அடைந்து விடுமா என கோவிந்தசாமி கேட்டதற்கு அந்த நபர் தடையாகும் என நினைத்துக் கொண்டு ஒரு விசயத்தைத் தொடங்கினால் நிச்சயம் தொடங்கவே முடியாது. வாகனம் பழுது ஆகாது என்ற நம்பிக்கையில் தான் ஓட்டுகிறார் அவர் என்றார்.

இரண்டு நாட்கள் என கரடு முரடான பாதையில் பயணம் தொடர்ந்து ஒரு இடத்தில் இறக்கிவிட்டார்கள். இங்கிருந்து கங்கையை கடந்து சென்றால் காசி வந்துவிடும். இங்கேயே கரைத்துவிடுங்கள் அந்த சாம்பலை என்றார் அந்த நபர். கோவிலுக்கு அருகில் சென்று கரைக்கிறேன் என்றார் கோவிந்தசாமி.

சிரமத்துடன் காசியை அடைந்தார்கள். அங்கு எங்குப் பார்த்தாலும் கோவில்கள்.முதலில் சித்தரை பார்க்கலாம் என்றார் அந்த நபர். காசியைக் கண்டு ஆனந்தம் கொண்டாலும் தனது கனவில் கண்ட கோவில் அங்கே இல்லாதது கோவிந்தசாமிக்கு ஏமாற்றமாக இருந்தது.

(தொடரும்)